ఇలా బట్టలు ఉతికితే ఎక్కువ రోజులు కొత్తవాటిలా ఉంటాయ్..

బట్టలు వాడేకొద్ది మెరుపు తగ్గి పాతవాటిలా మారుతుంటాయి. వీటిని అలా కొన్నిరోజులు వాడి పారేయలేం. కొత్తవాటిలా మార్చాలంటే కిటుకులు తెలిసి ఉండాలి. అవేంటో తెలుసుకుందాం.

డబ్బు పెట్టి కొన్న డబ్బులు త్వరగా పాడైతే మనసుకి బాధగా ఉంటుంది. ఇలా బట్టలు వెలిసిపోయి పాతగా మారితే వాటిని వేసుకోవాలనిపించదు. ఇబ్బందిగా ఉంటుంది. అలా కాకుండా ఉండేందుకు కొన్ని టిప్స్ ఉన్నాయి. అవేంటో ఇప్పుడు చూద్దాం.

ఉప్పు నీటిలో నానబెట్టడం..

బట్టలు ఉతికే ముందు ఉప్పు నీటిలో నానబెట్టాలి. ఇందుకోసం బకెట్ నీటిలో కొద్దిగా ఉప్పు కలపండి. ఇందులో బట్టలు నానబెట్టండి. తర్వాత ఉతకండి.

వెనిగర్..

ఉప్పులానే వెనిగర్ కూడా బట్టల రంగు పోకుండా చేస్తుంది. అందుకోసం కొత్త బట్టలు ఉతికే ముందు కప్పున్నర వెనిగర్‌ని నీటిలో పోసి నానబెట్టండి. తర్వాత కాసేపటికి ఉతకండి. దీని వల్ల మంచి ఫ్యాబ్రిక్ సాఫ్ట్‌నర్‌లా కూడా పనిచేస్తుంది.

రెగ్యులర్ వాషింగ్ వద్దు..

బట్టలు ఉతకడం మంచిదే. కానీ, వేసుకున్న కాసేపటికే బట్టలు ఉతకాల్సిన అవసరం లేదు. అప్పుడు కాసేపు గాలిలో ఉంచి వీటిని మళ్ళీ మడతపెట్టి మరోసారి వేసుకోవచ్చు. ఎక్కువగా బట్టలు ఉతకడం వల్ల వాటి మెరుపు తగ్గిపోతుందని గుర్తుపెట్టుకోండి.

డ్రైయర్స్..

బట్టలు త్వరగా ఆరడానికి చాలా మంది డ్రైయర్స్ వాతారు. కానీ, రెగ్యులర్‌గా డ్రైయర్స్ వాడడం వల్ల బట్టలు పాడవుతాయి. బట్టలు బట్టలు గరుకుగా మారతాయి. అందుకే బట్టలు సహజంగా గాలికి ఆరేలా చూడండి. దీని వల్ల వాటి మెరుపు చెక్కు చెదరదు.

నీడలో ఆరబెట్టడం..

బట్టల్ని నేరుగా ఎండలో ఆరబెట్టడం వల్ల కూడా వాటి మెరుపు తగ్గుతుంది. అందుకే, అలా కాకుండా వాటిని సహజంగా నీడలో ఆరబెట్టడం మంచిది. దీని వల్ల సూర్యరశ్మి ఎఫెక్ట్ ఉండదు.

Also Read : ఇంటి గోడలపై మచ్చలు పడ్డాయా.. ఇలా క్లీన్ చేయండి..

ఇన్‌స్ట్రక్షన్స్..

బట్టలు కొన్నప్పుడు వాటిపై ఎలా ఉతకాలో ‌కొన్ని సూచనలు ఇచ్చి ఉంటారు. వాటిని వాడడం మంచిది. కొన్నింటిపై బ్లీచ్, డ్రై క్లీన్ చేయొద్దొని ఉంటుంది. వాటిని ఆ విధంగానే ఉతకడం మంచిది. దీని వల్ల వాటి మెరుపు ఎప్పటికీ అలానే ఉంటుంది.

చల్లని నీటిలో..

కొంతమంది బట్టలపై మరకలు పోయేందుకు వాటిని వేడినీటిలో వేసి ఉతుకుతారు. అయితే, అలా చేస్తే రంగు మారతాయని గుర్తుపెట్టుకోండి. అలా కాకుండా చల్లని నీటిలోనే బట్టలు ఉతకండి. అప్పుడే బట్టలు చక్కగా కొత్తవాటిలా ఉంటాయి.

ఫ్యాబ్రిక్ కండీషనర్..

బట్టలు ఉతికాక వాటిని మంచి కండీషనర్‌లో కనీసం 15 నిమిషల పాటు నానబెట్టి ఆరేస్తే వాటి రంగు పోకుండా చక్కగా ఉంటాయి. వీటి వల్ల చక్కని సువాసన కూడా ఉంటాయి. బట్టలు మృదువుగా కూడా ఉంటాయి.

Also Read : ఆకుకూరలు ఎక్కువ రోజులు తాజాగా ఉండాలంటే ఇలా చేయండి..

ఉతికినప్పుడు..

బట్టలను ఉతికినప్పుడు చాలా మంది ఎక్కువగా బ్రష్ చేయడం, ఎక్కువగా ఉతకడం లాంటివి చేస్తుంటారు. దీని వల్ల బట్టలు త్వరగా రంగు పోయి చూడ్డానికి పాతవాటిలా ఉంటాయి. అలా కాకుండా వీటిని సున్నితంగా ఉతికేలా చూడండి.

2023-06-05T11:02:27Z dg43tfdfdgfd