ఒత్తిడితో యువత డ్రగ్స్కు అలవాటు పడుతున్నరు
ఒత్తిడితో యువత డ్రగ్స్కు అలవాటు పడుతున్నరు
కూకట్ పల్లి, వెలుగు : యువత భవిష్యత్ను అంధకారంలోకి నెడుతున్న డ్రగ్స్ వాడకాన్ని నివారించి సమాజాన్ని రక్షించుకోవాల్సిన బాధ్యత అందరిపై ఉందని రాష్ట్ర హైకోర్టు జడ్జి జస్టిస్ బి.విజయ్ సేన్ రెడ్డి అన్నారు. రోజురోజుకు పెరుగుతున్న డ్రగ్స్ వాడకం సామాజిక రుగ్మతగా మారి ఆందోళన కలిగిస్తున్నదన్నారు. జేఎన్టీయూ, తెలంగాణ స్టేట్ కౌన్సిల్ ఆఫ్ హయ్యర్ ఎడ్యుకేషన్, ధర్మసేన చారిటబుల్ సంస్థ ఆధ్వర్యంలో శనివారం కూకట్ పల్లిలోని జేఎన్టీయూ ఆడిటోరియంలో ‘నార్కొటిక్ డ్రగ్స్ నివారణ’ అంశంపై అవగాహన సదస్సు నిర్వహించారు. హైకోర్టు జడ్జి విజయ్సేన్ రెడ్డి చీఫ్గెస్టుగా హాజరై మాట్లాడారు.
ప్రస్తుత పరిస్థితుల్లో యువత ఒత్తిడిని జయించలేక తప్పుడు బాట పడుతూ, పరిస్థితుల ప్రభావానికి లొంగి డ్రగ్స్కి బానిసలుగా మారుతున్నారని ఆయన ఆందోళన వ్యక్తం చేశారు. ఒకసారి డ్రగ్స్కి అలవాటు పడిన వారు బయటపడటం చాలా కష్టమని, అసలు అలాంటి అవకాశాన్నే ఇవ్వకుండా డ్రగ్స్ నివారణకు అందరూ కృషి చేయాలని ఆయన సూచించారు. ఏటా డ్రగ్స్ కేసుల్లో శిక్షలు పడుతున్న వారి సంఖ్య కూడా గణనీయంగా పెరుగుతున్నదని వెల్లడించారు.
హైదరాబాద్ సిటీలో విచ్చలవిడిగా పెరుగుతున్న పబ్స్, బార్లు కూడా యువతను డ్రగ్స్ వైపు ఆకర్షిస్తున్నాయని ఆయన తెలిపారు. జేఎన్టీయూ వైస్ చాన్సలర్ కట్టా నర్సింహారెడ్డి మాట్లాడుతూ.. డ్రగ్స్ నివారణకు వర్సిటీ ఆధ్వర్యంలో ప్రత్యేక చర్యలు తీసుకుంటున్నామన్నారు. డ్రగ్స్ నివారణకు అందరం కట్టుబడి ఉంటామని కార్యక్రమానికి హాజరైన వారితో ఆయన ప్రతిజ్ఞ చేయించారు. హయ్యర్ ఎడ్యుకేషన్ కౌన్సిల్ చైర్మన్ ఆర్.లింబాద్రి, ధర్మసేన సంస్థ ప్రతినిధి నిశాంత్, వర్సిటీ రెక్టార్ ప్రొఫెసర్ ఎ.గోవర్ధన్ తదితరులు పాల్గొన్నారు.
©️ VIL Media Pvt Ltd. 2023-06-04T04:17:27Z dg43tfdfdgfd