VARALAKSHMI VRATAM 2024 వరలక్ష్మీ వ్రతం వేళ ఈ పనులు తప్పనిసరిగా చేయాలని గుర్తుంచుకోండి...

Varalakshmi Vratam 2024 ఈ ఏడాది ఆగస్టు నెలలో 16వ తేదీ రెండో శుక్రవారం నాడు వరలక్ష్మీ వ్రతాన్ని జరుపుకోనున్నారు. ఈ వ్రతాన్ని ఆచరించే వారు ఈ పనులు తప్పకుండా చేయాలి. అదేవిధంగా పొరపాటున కూడా కొన్ని పనులు చేయకూడదు. ఆ విశేషాలేంటో ఇప్పుడు తెలుసుకుందాం...

Varalakshmi Vratam 2024 హిందూ పంచాంగం ప్రకారం, ప్రతి ఏడాది శ్రావణ మాసంలో పౌర్ణమికి ముందు వచ్చే శ్రావణ శుక్రవారం రోజున వరలక్ష్మీ వ్రతం జరుపుకుంటారు. వర అంటే వరాలిచ్చే లక్ష్మీ అని అర్థం. మనకు సిరి సంపదలను పెంచే దేవతను ఆరాధించే పండుగ కాబట్టే వరలక్ష్మీ వ్రతం అంటారు. ఈ వ్రతాన్ని ఎక్కువగా వివాహిత మహిళలే చేస్తారు. పురాణాల ప్రకారం, ఈ పవిత్రమైన రోజున వరలక్ష్మీ దేవిని పూజిస్తే చాలు అష్టలక్ష్మీ దేవతలందరినీ కలిపి పూజించిన ఫలితాలొస్తాయని పండితులు చెబుతారు. ఇలా శ్రావణ శుక్రవారం పర్వదినాన అమ్మవారిని ఆరాధించడం వల్ల కుటుంబం జీవితంలో కష్టాలన్నీ తొలగిపోయి, సుఖశాంతులు దక్కుతాయని భక్తులందరూ నమ్ముతారు. ఇదిలా ఉండగా.. వరలక్ష్మీ వ్రతాన్ని జరుపుకునే వారంతా ఈ పనులు తప్పకుండా చేయాలి.. అదేవిధంగా పొరపాటున కూడా ఈ పనులు చేయకూడదు.. ఈ సందర్భంగా వరలక్ష్మీ వ్రతం రోజున ఏమి చేయాలి.. ఏమి చేయకూడదనే ఆసక్తికరమైన విషయాలను ఇప్పుడు తెలుసుకుందాం...తొలి పూజ వినాయకుడికే..

వరలక్ష్మీ దేవి వ్రతాన్ని సాక్షాత్తు పరమేశ్వరుని సతీమణి పార్వతీ దేవి కూడా ఆచరించిందని పురాణాల్లో పేర్కొనబడింది. తన కుటుంబ సంక్షేమం కోసం తను ఈ వ్రతాన్ని ఆచరించినట్లు శాస్త్రాల ద్వారా తెలుస్తోంది. అప్పటి నుంచి వివాహం అయిన మహిళలందరూ ఈ వ్రతం చేయడాన్ని ఆనవాయితీగా కొనసాగిస్తున్నారు. ఈ పవిత్రమైన రోజున వ్రతం చేసే వారు సూర్యోదయం కంటే ముందే నిద్ర లేచి, శుభ్రమైన దుస్తులను ధరించాలి. మరీ ముఖ్యంగా ఈరోజు తప్పనిసరిగా ఉపవాస దీక్షను కొనసాగించాలి. ముందుగా వినాయకుడి పూజ చేయాలి.

అమ్మవారి విగ్రహాలంకరణ..

వరలక్ష్మీ వ్రతానికి ముందు అమ్మవారి విగ్రహాన్ని శుభ్రం చేసి, పువ్వులతో అలంకరించాలి. అనంతరం కలశ స్థాపన, గణపతి పూజ, కలశ పూజ, కంకణ పూజ చేయాలి. ఆ తర్వాత అష్టోత్తర శతనామావళి పఠించాలి. అనంతరం వ్రతం కథ చదవాలి. ఇలా చేయడం వల్ల సకల శుభాలు కలుగుతాయని చాలా మంది నమ్ముతారు.

అమ్మవారి అనుగ్రహం కోసం..

వరలక్ష్మీ వ్రతం చేసే వారు ఎంతో భక్తి శ్రద్ధలతో అమ్మవారిని పూజించాలి. వరాలిచ్చే తల్లి కాబట్టి మీరు మనస్ఫూర్తిగా అమ్మవారిని ఆరాధిస్తే చాలు.. లక్ష్మీదేవి ఆశీస్సులు మీకు తప్పకుండా లభిస్తాయి. శ్రావణ శుక్రవారం వంటి పవిత్రమైన రోజున వ్రతం చేసినా లేదా ఈ వ్రతాన్ని ప్రత్యక్షంగా చూసినా.. ఈ వ్రతం కథను చదివినా ఎంతో పుణ్యఫలం దక్కుతుందని చాలా మంది నమ్ముతారు. ఈ పవిత్రమైన పండుగ సందర్భంగా కొందరు వారి సామర్థ్యం మేరకు అమ్మవారి రూపాన్ని అందంగా అలంకరించి ఘనంగా పూజలు చేస్తారు. అయితే అలా వీలు కాని వారు కేవలం కలశం పెట్టి పూజించినా అమ్మవారి అనుగ్రహం తప్పక లభిస్తుంది.

ఇలా చేయకండి..

* వరలక్ష్మీ వ్రతం రోజున కలశాన్ని గాజు పాత్రలో పెట్టకూడదని గుర్తుంచుకోండి. జ్యోతిష్యం ప్రకారం, కేవలం వెండి లేదా ఇత్తడి పాత్రలోనే ఉంచాలి.* వరలక్ష్మీ వ్రతం వేళ కొందరు ముందుగా లక్ష్మీదేవిని పూజిస్తారు. అయితే అలా ఎప్పటికీ చేయకూడదు. ముందుగా విఘ్నాలు తొలగించే వినాయకుడిని పూజించాలి. ఆ తర్వాతే లక్ష్మీదేవిని పూజించాలని గుర్తించుకోండి.* వరలక్ష్మీ వ్రతం చేసే వారు కచ్చితంగా ఉపవాస దీక్ష ఉండాలి. అలాగే నలుపు రంగు దుస్తులను ధరించకూడదు.

ఈ పనులు చేయకండి..

* శ్రావణ మాసంలో రెండో శుక్రవారం రోజున వరలక్ష్మీ వ్రతం చేసే వారు అమ్మవారిని ఆరాధించేటప్పుడు చాలా ఏకాగ్రతతో ఉండాలి. * ఈ పర్వదినాన రోజున పొరపాటున కూడా కోపం తెచ్చుకోకూడదు. ఇతరులను తిట్టడం, తిట్టుకోవడం వంటివి చేయరాదు. * వీలైనంత ఎక్కువ సమయం ప్రశాంతంగా ఉండాలి.* ఉపవాసం ఉండే వారు ఒక పూట పండ్లను లేదా పాలు మాత్రమే తీసుకోవాలి. ఇతర ఆహారాలను పొరపాటున తీసుకోకూడదు.* ఈ రోజున సూర్యోదయం తర్వాత నిద్ర లేవకూడదు.* ఈ పవిత్రమైన రోజున మద్యం, మాంసాహారానికి దూరంగా ఉండాలి.గమనిక : ఇక్కడ అందించిన భక్తి సమాచారం, పరిహారాలన్నీ, జ్యోతిష్యం, మత విశ్వాసాలపై ఆధారపడి ఉన్నాయి. ఇవి కేవలం ఊహాల ఆధారంగా ఇవ్వబడింది. దీనికి సంబంధించి ఎలాంటి శాస్త్రీయ ఆధారాలు లేవు. ఈ సమాచారాన్ని మీరు పరిగణనలోకి తీసుకునేందుకు సంబంధిత నిపుణులను సంప్రదించి పూర్తి వివరాలను తెలుసుకోగలరు. పై సమాచారాన్ని ‘‘సమయం తెలుగు’’ దృవీకరించడం లేదు.

Read Latest Religion News and Telugu News