అగ్గిపెట్టెలో పట్టే పట్టు చీరలు.. సిరిసిల్ల నేతన్న అద్భుత సృష్టి

అగ్గిపెట్టెలో పట్టే పట్టు చీరలను తయారీ చేయడం మన చేనేతకారుల అద్భుత సృష్టి. ఒకనాటి వైభవంగా మిగిలిపోయిన ఈ ప్రతిభను సిరిసిల్ల చేనేత కార్మికుల వారసులు మళ్లీ ప్రాచుర్యంలోకి తీసుకొస్తున్నారు. అగ్గిపెట్టెల్లో ఇమిడిపోయే పట్టుచీరలను మరింత అద్భుతంగా తయారు చేస్తూ.. తమ తండ్రుల వారసత్వాన్ని కొనసాగిస్తున్నారు. తెలంగాణలోని సిరిసిల్ల జిల్లా కేంద్రానికి చెందిన చేనేతకారుడు నల్ల విజయ్ కుమార్ తన తండ్రి వారసత్వాన్ని పునికిపుచ్చుకొని కొన్నేళ్లుగా అగ్గిపెట్టెలో అమర్చగలిగే పట్టుచీరలను నేస్తున్నారు. అలాంటి అద్భుత కళాఖండాలను ప్రముఖ ఆలయాలకు కానుకగా అందజేస్తున్నారు.

తాజాగా అగ్గిపెట్టెలో కూర్చగలిగే పట్టు శాలువాను విజయ్ కుమార్ తయారు చేశారు. ఆ పట్టు శాలువాను తెలంగాణలో ప్రముఖ పుణ్యక్షేత్రమైన కొండగట్టు ఆంజనేయ స్వామి ఆలయానికి కానుకగా ఇచ్చారు. తానే స్వయంగా నేసిన పట్టు శాలువాను శనివారం (సెప్టెంబర్ 14వ తేదీన) రోజున కొండగట్టు ఆలయ పర్యవేక్షకుడు గుండి హరిహరానాథ్‌కు అందజేశారు విజయ్ కుమార్. ఈ సందర్భంగా.. ఆలయ అర్చకులు స్వామి వారికి ప్రత్యేక పూజలు చేసి.. చేనేత కళాకారుడి కానుకను అలకరించారు. స్వామివారికి అద్బుత కళాఖండాన్ని కానుకగా సమర్పించిన చేనేత కళాకారుడైన నల్ల విజయ్ కుమార్ కుటుంబానికి అర్చకులు.. తీర్థ ప్రసాదాలు అందజేసి ఆశీర్వచనాలు అందించారు.

తన తండ్రి నల్ల పరంధాములు 1987 లోనే అగ్గిపెట్టేలో పట్టే పట్టు చీరను తయారు చేసి.. ఎంతో మంది రాజకీయ నాయకుల ప్రశంసలు అందుకున్నారని నల్ల విజయ్ కుమార్ తెలిపారు. తాను స్వయంగా నేసిన ఆ అద్భుత కళాఖండాలను తిరుమల శ్రీవారికి, వేములవాడ రాజన్నతో పాటు కొండగట్టు అంజన్నకు బహుకరించినట్టు తెలిపారు.

తన తండ్రి వారసత్వాన్ని పునికి పుచ్చుకున్న తాను కూడా.. తన తండ్రి బాటలోనే.. అగ్గిపెట్టెలో పట్టే పట్టు చీరలు తయారు చేయటమే కాకుండా.. తిరుమల తిరుపతి వేంకటేశ్వరస్వామి ఆలయానికి, వేములవాడ రాజరాజేశ్వర స్వామి ఆలయానికి కానుకగా ఇచ్చినట్లు చేనేత కళాకారుడు విజయ్ కుమార్ తెలిపారు. ఈ క్రమంలోనే.. కొండగట్టు ఆంజనేయ స్వామికి.. అగ్గిపెట్టేలో ఇమిడిపోయే పట్టు శాలువాను కానుకగా ఇచ్చినట్టు వివరించారు.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-09-14T16:58:24Z dg43tfdfdgfd